Azərbaycan, Bakı, 2 may / Trend müxbir Ə.Həsənov /
Azərbaycan dünyanın bütün ölkələri ilə ticari-iqtisadi, o cümlədən investisiya əməkdaşlığı məsələlərində əlaqələrin inkişafına böyük diqqət ayırır. Trend-in məlumatına görə, bu barədə İqtisadi Əməkdaşlıq Təşkilatı (ECO) ölkələrinin ticarətin təşviqi üzrə təşkilatlarının rəhbərlərinin ikinci iclası zamanı Azərbaycanın iqtisadi inkişaf nazirinin müavini Sevinc Həsənova bildirib.
"Azərbaycan hökumətinin əsas prioriteti qeyri-neft sektorunun inkişafıdır və bu prosesdə ticarət əlaqələrinin rolu qeyri-neft ixracının genişləndirilməsi baxımından böyük rol oynayır. Eləcə də ECO ölkələri ilə ticarət əlaqələrinin inkişafı üçün böyük potensial mövcuddur", - Həsənova deyib.
2011-ci ilin yekunları üzrə Azərbaycanın ECO ölkələri ilə ticarət münasibətlərinin göstəricisi 2,6 milyard dollar təşkil edir ki, bu da 2010-cu ilin yekunlarına dair analoji göstəricidən 30 faiz çoxdur.
Nazir müavini son 8 ildə Azərbaycanın əldə etdiyi iqtisadi uğurları da qeyd edib. Bu dövrdə ölkədə ÜDM üçqat, büdcə isə 12 dəfə artıb.
Həsənovanın sözlərinə görə, Azərbaycan dünya maliyyə böhranından inamla çıxıb.
ECO 1985-ci ildə İran, Pakistan və Türkiyə tərəfindən yaradılıb.