Azərbaycan, Bakı, 13 iyun /Trend, müxbir A.Axundov/
"AtaSığorta" ASC-nin səhmdarları nizamnamə kapitalının 10 milyon manata çatdırılması barədə qərar qəbul ediblər. Hazırda şirkətin nizamnamə kapitalı 7,6 milyon manat təşkil edir.
Bu barədə cümə axşamı Trend-ə şirkətin İdarə Heyətinin sədri Müseyib Əliyev deyib.
Onun sözlərinə görə, iyunun 13-də şirkət səhmdarlarının 2012-ci maliyyə ilinin yekunlarına həsr olunmuş növbəti illik ümumi yığıncağı keçirilib.
Əliyev qeyd edib ki, kapitalın artırılması səhmdarların əlavə vəsaitləri hesabına həyata keçiriləcək.
Ümumi yığıncaqda 2012-ci ilin yekunları üzrə İdarə Heyətinin, Direktorlar Şurasının, Təftiş Komissiyasının hesabatları dinlənilib, kənar müstəqil auditor tərəfindən yoxlanılaraq rəy verilib. 2012-ci ilin yekunları üzrə maliyyə hesabatları təsdiq edilib, xalis mənfəətin bölüşdürülməsi və cəmiyyətin nizamnamə kapitalının artırılması barədə qərarlar qəbul olunub.
"AtaHoldinq" Sirkətlər Qrupuna daxil olan "AtaSığorta" 2004-cü ildən sığorta bazarında fəaliyyət göstərir. Şirkət 22 könüllü və 4 icbari sığorta növü üzrə müştərilərinə xidmət göstərir. İcbari Sığorta Bürosunun təsisçisi və iştirakçısıdır. "AtaSığorta" ASC-nin xidmət şəbəkəsinə 4 filial və 4 nümayəndəlik daxildir.