Azərbaycan, Bakı, 03 iyul / Trend , müxbir E.Babayev / Müxalif Azərbaycan Demokrat Partiyasının (ADP) seçkidə iştirak qərarını dəyişməsi ehtimalı böyük deyil. "Şəxsən mən yenə də seçkidə iştirakın tərəfdarıyam və çalışacağam ki, partiya üzvlərini buna inandırım",- deyə cümə axşamı Trend - a ADP sədri Sərdar Cəlaloğlu deyib.
Trend -un arayışı: İyunun 2-də Milli Məclisin qərarı ilə Seçki Məcəlləsində bir sıra dəyişikliklər edilib. Seçki kampaniyasının müddəti 120 gündən 75 günə endirilib. 75 günün 28-i təşviqat işlərinə, qalan günlər isə, namizədin müəyyən edilməsi, onun qeydə alınması üçün imzaların toplanması, imzaların Mərkəzi Seçki Komissiyası tərəfindən yoxlanılması və digər prosedur tədbirlərinə sərf olunacaq. Namizədin dəstəklənməsi üçün lazım olan imzaların sayı əvvəllər olduğu kimi 45 min yox, 40 min müəyyən edilib, dövlət KİV-də seçki təbliğatı qadağan olunub. İyunun 23 - də prezident əlavə və dəyişiklikləri təsdiqləyib. Azərbaycan müxalifəti əlavə və dəyişikliklərdən narazı qalıb və dəyişikliklərin seçkinin demokratik keçirilməsinə mənfi təsir göstərəcəyini bəyan edib.
ADP bu il fevralın 16 - da Cəlaloğlunun namizədliyini irəli sürüb. Seçki qanunvericiliyinə dəyişiklikdən sonra partiyanın Ali Məclisi yenidən çağırılıb. Avqustun 1 - də Ali Məclis ADP - nin seçkidə iştirakla bağlı qərarını müzakirə edib, yekun qərar verəcək.
Cəlaloğlu bildirib ki, Azərbaycanda beynəlxalq aləm tərəfindən real müxalifət kimi qəbul edilən partiyalar seçkiyə getməsə, bu, ölkənin imicinə mənfi təsir göstərəcək. "Biz seçkiyə heç də hakimiyyəti əldə etmək üçün getmirik. Çünki Azərbaycanda seçki yolu ilə hakimiyyəti dəyişmək imkanları məhduddur. Sadəcə, bizim seçkidə iştirakımız bu prosesin dəyərini artırmağa xidmət edə bilər" - deyən Cəlaloğlunun sözlərinə görə, həm də ölkədəki problemləri aktuallaşdırmaq, əhalini fəallaşdırmaq baxımından seçkiyə getmək vacibdir.
Sağ təmayüllü partiya olan ADP 1991- ci ildə Sərdar Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP - nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq, keçmiş sədr Rəsul Quliyev və tərəfdarları ADP- dən imtina edib, özlərinin Açıq Cəmiyyət Pariyasını yaradıblar.
Məqalə müəllifi ilə əlaqə ünvanı: [email protected]