Azərbaycan, Bakı, 24 yanvar / Trend , müxbir K.Zərbalıyeva/ Qərarları Avropa Məhkəməsi tərəfindən ləğv olunmuş hakimlərlə bağlı Məhkəmə-Hüquq Şurası intizam icraatına başlamayıb.
Məhkəmə-Hüquq Şurası Aparataının rəhbəri Cavid Hüseynov cümə axşamı Trend ə bildirib ki, Avropa Məhkəməsində qərarları ləğv olunmuş hakimlər barəsində intizam icraatının başlanması üçün Ali Məhkəmənin sədri MHŞ-yə müraciət etməyib. Aparat rəhbəri bildirib ki, Avropa Məhkəməsinin qərarları icra olunması üçün Ali Məhkəməyə göndərilir. Həmin qərarların bir neçəsi isə hələlik hüquqi qüvvəyə minmədiyindən onların icraasına da başlanılmayıb.
Hüseynov bildirib ki, Ali Məhkəmə tərəfindən belə bir müraciət olunmadığı halda, Şuranın həmin hakimlər haqqında intizam icraatına başlaması mümkün deyil.
Azərbaycanın İnsan Haqları üzrə Avropa Məhkəməsindəki səlahiyyətli nümayəndəsi Cingiz Əsgərov isə bildirib ki, Avropa Məhkəməsinin Azərbaycana qarşı qəbul etdiyi qərarların bir neçəsi məhkəmələrin qərarları ilə bağlıdır. "Həmin qərarlardan ikisi məhkəmə qərarlarının icra olunmaması, üçü Qeyri-Hökumət Təşkilatlarının qeydə alınmaması ilə bağlıdır" - deyə Əsgərov vurğulayıb.
Vəkil Rəşid Hacılı Trend ə bildirib ki, Azərbaycana qarşı çıxarılan qərarlar Ali Məhkəmə tərəfindən tam öyrənilməli və yol verilmiş məhkəmə səhvləri müəyyənləşdirilməlidir. Vəkil qeyd edib ki, "Məhkəmələr və Hakimlər haqqında" qanunda hakimlər barəsində intizam icraatının başlanması əsaslarından biri də hakimin qəbul etdiyi qərarların Avropa Məhkəməsi tərəfindən ləğv olunmasıdır. "Əgər Avropa Məhkəməsinin qərarında hüquq pozuntusunun məhkəmənin səhvi nəticəsində baş verdiyi qeyd olunubsa, onda həmin hakim barəsində intizam icraatının başlanması üçün əsas yaranır" - deyə vəkil vurğulayıb.
Hacılı Azərbaycana qarşı qəbul edilən bütün qərarların hakimlər barəsində intizam icraatının başlanması üçün əsas ola biləcəyini də istisna etmir. "İstər qeydiyyat, istərsə də məhkəmə qərarlarının icra olunmaması ilə bağlı problem ölkədaxili məhkəmə instansiyalarında mübahisələndiriləndən sonra Avropa Məhkəməsinə şikayət verilir. Azərbaycan vətəndaşlarının Ədliyyə Nazirliyinin və ya məhkəmə qərarlarının icrasından yayınan hüquqi və fiziki şəxslərin, dövlət məmurlarının hərəkət və ya hərəkətsizliyindən ölkədaxili məhkəmələrə şikayət etmək imkanı var" - deyə Hacılı bildirib.
Vəkil Fuad Ağayev isə hesab edir ki, vətəndaşların şikayətlərində bu məsələlər üzrə yerli məhkəmələrin qərarlarında hakimin hansısa qanunsuzluqlara yol verdiyi əsaslandırılarsa, həmin hakimin məsuliyyət məsələsi qaldırıla bilər.
Ağayevin sözlərinə görə, qərarları Avropa Məhkəməsində ləğv olunmuş hakimlər barəsində Ali Məhkəmənin Məhkəmə-Hüquq Şurasına intizam icraatının başlanması üçün müraciət etməməsi, gələcəkdə belə müraciətlərin olmayacağından xəbər vermir. "Ali Məhkəmə bundan heç vaxt qaça bilməz. Azərbaycan dövləti Avropa Məhkəməsinin qərarlarını icra etmək öhdəliyini götürüb" - deyə vəkil vurğulayıb.
Ədliyyə naziri Fikrət Məmmədov isə ötən ilin dekabrında jurnalistlərə açıqlamasında bildirmişdi ki, Avropa Məhkəməsində Azərbaycana qarşı çıxarılan qərarlar köhnə sovet qanunları əsasında baxılmış işlərlə bağlıdır.
Nazirin sözlərinə görə, həmin işlərlə bağlı Azərbaycan məhkəmələri sovet dövründə qəbul olunmuş qanunlara uyğun qərar qəbul edib.
"Sovet dövründən qalan qanunlar demokratik cəmiyyətin qanunlarına uyğun gələ bilməz. Avropa Məhəməsində baxılmış işlərlə bağlı çıxarılmış qərarlar da bu səhvlərlə bağlıdır. İndi Azərbaycanın bu sahədəki qanunvericiliyi daha da təkmilləşdirilib" -deyə nazir vurğulayıb.
Azərbaycan Əsas İnsan Haqları və Azadlıqları Haqqında Avropa Konvensiyasını 2001-ci ilin yanvarında ratifikasıya edib. Həmin ildən sonra Azərbaycan vətəndaşları Avropa Məhkəməsinə müraciət etmək hüququ qazanıblar.
Avropa Məhkəməsi Azərbaycana qarşı indiyədək 11 qərar qəbul edib.
