Azərbaycan, Bakı, 7 fevral/Trend, müxbir N.İsmayılova, İ.Xəlilova/
Azərbaycanın bank sektorunda vaxtı keçmiş kreditlərlərin həcminin artması 2010-cu ildə Azərbaycan banklarının gəlir həcminə mənfi təsir göstərib. Bu barədə bazar ertəsi Azərbaycan Bank Tədris Mərkəzinin (ABTM) direktoru Cavanşir Abdullayev deyib.
"Bu ilk növbədə bankların gəlir və mənfəətlərinə mənfi təsir göstərib. Buna görə 2010-cu ilədək bankların mənfəətləri əhəmiyyətli templərlə artırdısa, ötən il bu göstərici azalıb. Bank sisteminin ümumi mənfəəti 120 milyon manata yaxın olub. Bu isə kifayət qədər böyük olan sektor üçün kiçik göstəricidir", - Abdullayev bildirib.
2010-cu il ərzində bank sisteminin ümumi mənfəəti 52,5 faiz azalıb və ötən ilin noyabrı ilə müqayisədə 10,3 faiz artaraq 120,27 milyon manat təşkil edib.
Azərbaycan bankları 2010-cu ilin dekabrında iqtisadiyyata kreditləşməni 0,8 faiz, ötən ilin yekunları üzrə 9 faiz artırıblar. 2010-cu il dekabrın sonuna banklar tərəfindən 9163,4 milyon manat (o cümlədən 5865,3 milyon manta milli valyutada və 3298,1 milyon manta xarici valyutada) verilib.
AMB-nın kredit təşkilatlarının fəaliyyətinə nəzarət departamentinin direktoru Rəşad Orucovun fikrincə, ölkənin bank sistemində vaxtı keçmiş kreditlərlərlə bağlı vəziyyət 2009-cu ilin sonundan, 2010-cu ilin əvvəlindən tədricən sabitləşməyə başlayıb.
"Güman edirik ki, problemli kreditlərlə bağlı vəziyyət artıq beş faiz səviyyəsində qeydə alınıb və portfel artımı müşahidə olunmur. Hazırda banklar yığılıb qalan problemlərin həlli üzrə böyük səylər göstərir. Güman edirəm ki, 2011-ci ilin oratlarından etibarən biz artıq vaxtı keçmiş kreditlərlərlə bağlı vəziyyətin ciddi surətdə yaxşılaşacağını görəcəyik, buna görə indi banklar mövcud problemləri həll etmək üçün çoxlu resurs və vaxt sərf edirlər", - Orucov qeyd edib.
"Əsas odur ki, biz yaxşılaşmaya doğru yeniliklər görürük, lakin ciddi irəliləyişləri ilin ikinci yarısından gözləmək olar", - əlavə edib.
