Azərbaycan, Bakı, 17 aprel /Trend, müxbir İ.Xəlilova/
Azərbaycan Respublikası Dövlət Neft Fondu (ARDNF) investisiyalarının idarə edilməsi qismində "State Street Global Advisors" (SSGA) və "Union Bank of Switzerland"ı (UBS) seçərək xarici menecerlərin sayını 5-ə çatdırıb. Trend-in məlumatına görə, bu barədə çərşənbə günü "Ernst and Young" audit şirkətinin ARDNF-nin maliyyə fəaliyyətinə dair konsolidə edilmiş hesabatında deyilir.
"Yeni menecerlərlə saziş 2012-ci ildə imzalanıb, buna qədər isə ARDNF-nin vəsaitlərini "Deutsche Asset Management International GmbH", "Credit Suisse" və Beynəlxalq Yenidənqurma və İnkişaf Bankı (IRBD) (sonuncu Dünya Bankı qrupuna daxildir) idarə ediblər", - hesabatda deyilir.
Bağlanan sazişlərə əsasən, maliyyə institutları ARDNF-nin vəsaitlərini Fondun ümumi investisiya qaydalarına müvafiq idarə edirlər.
ARDNF 2011-ci ildə olduğu kimi, ötən il də vəsaitlərini "Bank of New York Mellon"da saxlamağa davam edib, bu vəsaitin saxlanmasına Fondun əldə etdiyi qiymətli kağızlar ayrılıb.