Azərbaycan, Bakı, 12 fevral /Trend, müxbir A.Axundov/
2014-cü ildə könüllü sığorta növlərinin inkişafı Azərbaycanın sığorta bazarı üçün prioritet olaraq qalacaq. "AtaSığorta" ASC-nin idarə heyətinin sədri Müseyib Əliyev belə hesab edir.
M.Əliyev Trend-ə bildirib ki, 2014-cü ildə sığortanın könüllü növlərinin inkişafının bazar üçün prioritet olaraq qalacağı artıq hiss olunur: "Vəziyyət iki-üç il əvvəl olduğundan son dərəcə fərqlənir. Adamlar artıq öz mülkiyyətini, məsuliyyətini, daşınmaz əmlakını və digərlərini sığorta etdirməyə can atırlar. Biz inkişaf etmiş ölkələrin keçdikləri mərhələləri keçirik və vaxt gələcək ki, könüllü sığortadan cəmiyyətin çox hissəsi istifadə edəcək".
Onun sözlərinə görə, 2014-cü il sığorta bazarında inkişaf ili olacaq ki, buna ötən il qanunvericilikdə edilən dəyişikliklər və bu il dəyişdirilməsi planlaşdırılan məcmu kapitala normativlər təsir edir:
"Maliyyə Nazirliyi yanında Dövlət Sığorta Nəzarəti Xidmətinin proqnozlarına görə, 2014-cü ildə bazar 20 faiz böyüyəcək. Daha böyük artım üçün imkanlar mövcuddur. Əgər sığortanın bütün istiqamətləri inkişaf edərsə, artım daha böyük olacaq. Təbii ki, bunun üçün həm institusional inkişaf baxımından, eləcə də əhalinin maarifləndirilməsi nöqteyi-nəzərindən vaxt lazımdır. Hesab edirəm ki, 2014-cü ildə DSNX bazarda uçotun təkmilləşdirilməsi ilə bağlı sığorta bazarında prudensial normativlərin tətbiqinə, uçotun beynəlxalq standartlara, beynəlxalq audit tələblərinə uyğunlaşdırılması, sığorta şirkətlərində daxili auditin effektiv təşkilinə və risklərin səmərəli idarə edilməsinə aid olan bir sıra qaydalar qəbul edəcək".
2013-cü ilin yekunları üzrə ölkədə fəaliyyət göstərən şirkətlərin mükafatlarının ümumi həcmi 405,68 milyon manat (il ərzində artım 18,44 faiz) olub. Hesabat dövründə ödəmələr isə 122,8 milyon manat (artım 30,83 faiz) təşkil edib.
Azərbaycanda 28 sığorta və bir təkrar sığorta şirkəti fəaliyyət göstərir.