Azərbaycan, Bakı, 7 mart /Trend, müxbir A.Axundov/
2013-cü ildə Maliyyə Nazirliyi yanında Dövlət Sığorta Nəzarəti Xidmətinə sığorta şirkətlərinin fəaliyyəti ilə bağlı daxil olmuş şikayətlərin sayı 2 dəfədən çox artıb.
Trend-in məlumatına görə, bunu cümə günü Dövlət Xidmətinin rəis müavini Müşfiq İsrafilov Bakıda İcbari Sığorta Bürosunun (İSB) 2013-cü ildə fəaliyyətinin yekunlarına və 2014-cü ildə vəzifələrinə həsr edilmiş tədbirdə çıxışı zamanı deyib.
Onun sözlərinə görə, ötən il Xidmətə 738 şikayət göndərilib. Bunlardan 438-i birbaşa, 200-ü Prezident Administrasiyası, 23-ü Milli Məclis, 34-ü Nazirlər Kabineti vasitəsilə daxil olub.
M.İsrafilov vurğulayıb ki, şikayətlərin çoxu ödənişdən qanunsuz imtina, zərərin düzgün qiymətləndirilməməsi, zərərin gec ödənilməsi prosesi ilə bağlıdır.
O bildirib ki, Xidmət 2013-cü ildə sığorta şirkətlərinin 699 min manat məbləğində sığorta ödənişindən imtinasını əsassız hesab edib. 2012-ci ildə isə bu rəqəm 462 min manat təşkil edib.
