Azərbaycan, Bakı, 26 may /Trend, müxbir Z.Qurbanova/
Fəaliyyət lisenziyası 2014-cü il fevralın sonlarında dayandırılan "Royal Sığorta" sığorta şirkəti satışa çıxarılacaq. Bu barədə bazar ertəsi Trend-ə şirkətin İdarə Heyətinin sədri Nüsrət Babayev bildirib.
Onun sözlərinə görə, şirkət həm qismən, həm də tam şəkildə satışa çıxarılacaq: "Biz artıq potensial investorlarla danışıqlar aparırıq. Şirkətin yerli, yaxud əcnəbi investorlara satılmasının əhəmiyyəti yoxdur".
N.Babayev qeyd edib ki, şirkətin satılmasında əsas məqsəd kapitala əlavə vəsaitlərin cəlb edilməsidir ki, bu da ona öz işini bərpa etməyə imkan verəcək: "Hazırda 1,7 milyon manat səviyyəsində olan məcmu kapitalın artırılması üçün yeni təsisçilər cəlb ediləcək".
Şirkətin nizamnamə kapitalı 5,5 milyon manat səviyyəsində formalaşıb.
Onun sözlərinə görə, "Royal Sığorta" şirkəti lisenziyasının bərpa olunmasından sonra təkrar sığorta fəaliyyətini də davam etdirməyi planlaşdırır. Sığorta qanunvericiliyindəki dəyişikliklərə uyğun olaraq, bunun üçün "Royal Sığorta"nın Maliyyə Nazirliyindən xüsusi icazə alması tələb olunur.
Ölkənin Maliyyə Nazirliyinin sığorta şirkətlərinin ümumi kapitalına tələbi beş milyon manatdır.
