Azərbaycan, Bakı, 13 iyun /Trend, müxbir Z.Qurbanova/
2014-cü ilin yanvar-may aylarında Azərbaycanın sığorta şirkətlərinin haqlarının 67 faizi (125,8 milyon manat) könüllü sığorta növləri üzrə toplanıb ki, bu da ötən ilin eyni dövrünün göstəricisini 15,5 faiz (16,9 milyon manat) üstələyir. Trend-in məlumatına görə, bunu cümə günü mətbuat konfransında Azərbaycan Sığortaçılar Assosiasiyasının (ASA) sədri Orxan Bayramov deyib.
Onun sözlərinə görə, sığortanın bu növləri üzrə ödənişlər 39,2 milyon manat (bütün ödənişlərin 71 faizi) təşkil edib ki, bu da 2013-cü ilin analoji dövrünün göstəricisini 13 faiz və ya 4,5 milyon manat üstələyir: "Hesabat dövründə icbari sığorta növləri üzrə yığımlar 33 faiz və ya sığorta haqlarının ümumi həcminin 61 milyon manatını təşkil edib ki, bu da ötən ilin ilk 5 ayının göstəricisindən 2,3 faiz (1,35 milyon manat) çoxdur. Sığortanın bu növləri üzrə ödənişlər 12,9 faiz (1,8 milyon manat) artaraq 16 milyon manat təşkil edib".
O.Bayramov qeyd edib ki, hesabat dövründə könüllü sığorta növləri üzrə yığımların hər 100 manatına 31,2 manat ödəniş edilib, halbuki 2013-cü ilin yanvar-may aylarında bu rəqəm təqribən 32 manat olub: "İcbari sığorta növləri üzrə hər 100 manata 26 manat düşür ki, bu da ötən ilin eyni dövrünün göstəricisindən 2 manat çoxdur".
ASA rəhbəri bildirib ki, cari ilin ilk 5 ayında qeyri-həyat sığortasının payına sığorta yığmlarının ümumi həcminin 137 milyon manatı (73 faiz) düşüb ki, bu da ötən ilin müvafiq dövrünün göstəricisindən 1,15 milyon manat (təxminən 1 faiz) çoxdur. Bununla belə, ödənişlər 52,3 milyon manat (94,7 faiz) olub ki, bu da ötən ilin eyni dövrünün göstəricisindən təqribən 5,1 milyon manat (təqribən 13 faiz) artıqdır: "Tibbi sığortanın payına qeyri-həyat sığortası üzrə yığımların 42,5 milyon manatı (31 faiz) düşüb. Bu zaman ödənişlər 19 milyon manat və ya 36,3 faiz olub. Ödənişlər 11 milyon manat və ya 20,7 faiz olmaqla icbari avtomobil sığortasının payına 25,2 milyon manat (18,4 faiz) düşüb. Ödənişlər 11,2 milyon manat və ya 21,4 faiz olmaqla icbari avtonəqliyyat vasitələrinin könüllü sığortasının payına 14,4 milyon manat (10,5 faiz) düşüb. Ödənişlər 5,7 milyon manat və ya 10,9 faiz olmaqla əmlakın yanğından və digər risklərdən sığortasının payına 12,8 milyon manat (9,3 faiz) düşüb. Ödənişlər 868 min manat və ya 1,7 faiz olmaqla daşınmaz əmlakın icbari sığortasının payına isə 6,2 milyon manat (4,5 faiz) düşüb".
Hesabat dövründə qeyri-həyat sığortası bazarında hər 100 manat yığıma təqribən 38,2 manat ödəniş düşüb, 2013-cü ilin yanvar-may aylarında isə bu göstərici 34,8 manat olub.
Qeyd edək ki, Azərbaycanda 28 sığorta və 1 təkrar sığorta şirkəti fəaliyyət göstərir.
