Azərbaycan, Bakı, 16 iyul /Trend, müxbir Zülfiyyə Qurbanova/
2014-cü ilin yanvar-iyun aylarında Azərbaycandakı 28 sığorta şirkətindən 11-də sığorta yığımlarının artımı, 17-də isə azalması müşahidə edilib. Trend-in məlumatına görə, bu barədə çərşənbə günü Azərbaycan Sığortaçılar Assosiasiyasının rəhbəri Orxan Bayramov ilin birinci yarısında ölkədəki sığorta şirkətlərinin fəaliyyətinə həsr edilmiş mətbuat konfransında bildirib.
Onun sözlərinə görə, yanvar-iyun aylarında yığımların həcmi üzrə bazarın lideri 31,2 milyon manatla "Paşa Sığorta" sığorta şirkətidir. Daha sonra sığorta yığımları 22,7 milyon manat olan "Atəşgah Həyat" şirkəti və ilin birinci yarısında yığımlarının həcmi 21,9 milyon manat təşkil edən "Paşa Həyat" gəlir.
O.Bayramov deyib: "Bu ilin ilk altı ayı ərzində sığorta yığımları üzrə ilk beşliyə "Azərsığorta" dövlət sığorta kommersiya şirkəti (18,9 milyon manat) və "AzSığorta" (17,9 milyon mana) daxil olub".
Assosiasiya rəhbərinin sözlərinə görə, yığımların ümumi həcmindən 53 faiz ilk beşliyə daxil olan şirkətlərin payına düşür.
Bayramov onu da qeyd edib ki, hesabat dövründə nisbətən aşağı yığım həminə daxil olan şirkətlər "Əmrah Sığorta" (431 min manat), "Era-Trans" (335 min manat), "Azərqarant" (318 min manat), "Günay Sığorta" (121 min manat), "Çartis Azərbaycan" (39 min manat) və "Royal Sığorta" (2255 manat) olublar ki, onların ümumi yığımları 1,25 milyon manata yaxın (yığımların ümumi həcminin bir faizindən az) təşkil edib.
O əlavə edib: "Ümumilikdə, 28 sığorta şirkətindən yeddisinin sığorta yığımları 10 milyon manatı ötüb, altısında 5-10 milyon manat civarındadır, 9-da 1-5 milyon manat, altısında 0,5 milyon manatdan az təşkil edir".
Assosiasiya rəhbərinin qeyd etdiyi kimi, ödənişlərin həcmi üzrə liderlik də "Paşa Sığorta" şirkətinə məxsusdur - 13,3 milyon manat. Daha sonra ödənişlərin həcmi üzrə "Atəşgah Sığorta" (6,8 milyon manat), "Azərsığorta" (6,6 milyon manat), "Azərbaycan Sənaye Sığorta" (6,5 milyon manat), "Azsığorta" (4,6 milyon manat) və "AXA MBASK" (4,5 milyon manat) şirkətləri gəlir. Onların ödənişlərinin ümumi həcmi yanvar-iyun aylarında 42,3 milyon manat (ödənişlərinin ümumi həcmi 65 faizini) təşkil edir.
Bayramov deyib: "Nisbətən daha az ödəniş məbləğinə "İpək yolu Sığorta" (52,4 min manat), "Azərqarant" (47,4 min manat), "Günay Sığorta" (26,1 min manat), "Royal Sığorta" (8,3 min manat) və "Çartis Azərbaycan" (272 manat) şirkətləri malikdirlər. Həmin şirkətlərin ödənişlər üzrə ümumi göstəriciləri təxminən 140 min manatdır (ödənişlərin ümumi həcminin 0,4 faizi)".
Azərbaycanda 28 sığorta və bir təkrar sığorta şirkəti fəaliyyət göstərir.
