Azərbaycan, Bakı, 16 sentyabr /Trend, müxbir Azad Həsənli/
Azərbaycanda həyat sığortası ilə məşğul olmaq hüququna malik üç şirkət - "Paşa Həyat", "Atəşgah Həyat" və "Qala Həyat" 2014-cü ilin yanvar-avqust aylarında həyat sığortasının bütün növləri üzrə 69,8 milyon manat sığorta haqqı yığıblar ki, bu da ötən ilin analoji dövrünün göstəricisindən 56,5 faiz (25,2 milyon manat) çoxdur. Trend xəbər verir ki, bu barədə çərşənbə axşamı Azərbaycan Sığortaçılar Assosiasiyasının (ASA) rəhbəri Orxan Bayramov mətbuat konfransında bildirib.
Onun sözlərinə görə, ölkədə fəaliyyət göstərən sığorta şirkətlərinin yığımlarının ümumi həcmində həyat sığortası yığımlarının payı 24,6 faiz təşkil edib.
Həyat sığortası bazarında toplanan mükafatların ümumi həcmində 51,7 faiz (36,1 milyon manat) yaşam sığortasının payına düşüb. İstehsalatda bədbəxt hadisələrdən sığorta üzrə yığımlar 32,1 faiz (22,4 milyon manat), həyatın ölüm hallarından sığortası 15,8 faiz (11 milyon manat) təşkil edib. Yerdə qalan hissə sağalmaz xəstəliklərdən həyat sığortasının hesabına (279 min manat) təmin olunub.
2014-cü ilin yanvar-avqust aylarında sığortanın bütün növləri üzrə 20,4 milyon manat və ya bazarın ödənişlər üzrə bütün həcminin 19,7 faizi təmin olunub. 2013-cü ilin analoji dövrü ilə müqayisədə bu məbləğ 7,4 dəfə, yaxud 17,7 milyon manat təşkil edib.
Ödənişlərin ümumi həcmindən 87,6 faiz, yaxud 17,8 milyon manat yaşam sığortası üzrə ödənişlər təşkil edib. İstehsalatda bədbəxt hadisələrdən sığorta üzrə ödənişlər 9,15 faiz (1,87 milyon manat), həyatın ölüm hallarından sığortası 3,22 faiz (658 min manat) və sağalmaz xəstəliklərdən sığorta ödənişləri üzrə 12500 manat olub.
Bununla yanaşı, hesabat dövründə yığımların hər yüz manatı üçün 29,2 manat ödənilib. Ötən ilin yanvar-avqustunda bu göstərici hər yüz manat üçün 6,2 manata bərabər olub.
ASA rəhbərinin qeyd etdiyi kimi, hesabat dövründə həyat sığortası üzrə yığımların hər yüz manatına 29,2 manat ödəniş edilib ki, ötən ilin eyni dövründə bu göstərici 6,2 manat olub.
Ölkədə həyat sığortası bazarı 2011-ci ildən fəaliyyətə başlayıb.