Azərbaycan, Bakı, 16 avqust /Trend, müxbir Azad Həsənli/
Bu ilin yanvar-avqust aylarında sığorta haqlarının 65,2%-i və ya 184,6 milyon manatı könüllü sığorta növlərinin payına düşüb. Bu, ötən ilin eyni dövrü ilə müqayisədə 5,4% və ya 9,4 milyon manat çoxdur. Trend-in məlumatına görə, bunu çərşənbə axşamı Azərbaycan Sığortaçılar Assosiasiyasının (ASA) sədri Orxan Bayramov mətbuat konfransında deyib.
İcbari sığorta növləri üzrə yığımlar isə 98,7 milyon manat və ya bazarın 34,8%-ni təşkil edir. Ötən ilin eyni dövrü ilə müqayisədə icbari sığorta bazarı 9% və ya 8,1 milyon manat artıb.
Onun sözlərinə görə, hesabat dövründə ən böyük sığorta ödənişləri də könüllü sığorta növlərinin payına düşür: "2014-cü ilin ilk 8 ayında ümumi ödənişlərin 73,5%-i və ya 76,1 milyon manatı könüllü sığorta növlərinin payına düşüb. Könüllü sığortalar üzrə ödənişlər ötən ilin eyni dövrünə nisbətən 37,9% və ya 21,6 milyon manat artıb".
İcbari sığorta növləri üzrə ödənişlər isə 17,4% və ya 4,1 milyon manat artaraq 27,5 milyon manata çatıb.
Hesabat dövründə könüllü sığortadan toplanmış hər 100 manat sığorta haqqı müqabilində 41,2 manat ödəniş həyata keçirilib. Ötən ilin yanvar-avqust aylarında bu göstərici 31,1 manat olub. İcbari sığorta üzrə toplanan hər 100 manat üzrə ödəniş isə ötənilki 25,8 manatdan 27,8 manata qalxıb.
