Azərbaycan, Bakı, 16 oktyabr /Trend, müxbir Azad Həsənli/
2014-cü ilin yanvar-sentyabr aylarında Azərbaycanın sığorta bazarında sığorta haqlarının 65 faizi və ya 204,1 milyon manatını sığortanın könüllü növləri təmin edib. Bu, ötən ilin analoji dövrünün göstəricisindən 0,8 faiz, yaxud 1,6 milyon manat çoxdur. Trend xəbər verir ki, bu barədə cümə axşamı Azərbaycan Sığortaçılar Assosiasiyasının (АSА) rəhbəri Orxan Bayramov 9 ayın yekunlarına həsr edilmiş mətbuat konfransında bildirib.
Ölkənin sığorta bazarında toplanan haqların 35 faizi, yəni 110 milyon manatı icbari sığorta növləri üzrə haqların payına düşür. Ötən iin analoji dövrü ilə müqayisədə bu göstərici 9,1 faiz yaxud, 9,15 milyon manat artıb.
O.Bayramov deyib ki, ödənişlərin 73,8 faizi, yaxud 85,9 milyon manatı könüllü sığorta növlərinin payına düşüb: "Ötən ilin eyni dövrü ilə müqayisədə bu göstərici 38,9 faiz, yaxud 24 milyon manat artıb. İcbari sığorta növləri üzrə ödənişlər 14,3 faiz, yaxud 3,8 milyon manat artaraq 30,5 milyon manat təşkil edib".
Hesabat dövründə toplanan hər 100 manat sığorta haqqı müqabilində 42,1 manat ödəniş həyata keçirilib. Ötən ilin yanvar-sentyabrında bu rəqəm 30,5 manat olub.
İcbari sığorta növləri üzrə ödənilən hər 100 manat müqabilində ödənişlər isə ötənilki 26,5 manatdan 27,8 manata çatıb.
