Azərrbaycan, Bakı, 16 oktyabr /Trend, müxbir Azad Həsənli/
Azərbaycanda kənd təsərrüfatı sığortası haqqında qanun layihəsinin hazırlanması başa çatır. Trend-in məlumatına görə, bunu Azərbaycan Sığortaçılar Assosiasiyasının (ASA) rəhbəri Orxan Bayramov mətbuat konfransında deyib.
Onun sözlərinə görə, hazırda Nazirlər Kabineti səviyyəsində müzakirələr aparılır: "Çox güman konseptual baza hazırlandıqdan sonra qanun layihəsi sığorta şirkətlərinə təqdim olunacaq ki, onlar praktiki fikirlərini ifadə edə bilsinlər".
O.Bayramov qeyd edib ki, qanun layihəsi hazırlanarkən Türkiyənin sığorta pul modeli və bu sahədəki təcrübəsi əsas götürülüb.
ASA rəhbəri əlavə edib ki, ölkədə kənd təsərrüfatı sığortası könüllü əsasda təşkil olunacaq: "Əgər fermer dövlətdən subsidiya və ya güzəştli kreditlər götürərsə, şərtlərdən biri təsərrüfatın sığortası olacaq. Məqsəd maliyyə dəstəyini göstərən şirkəti fövqəladə hallar zamanı zərərlərdən qorumaqdır".