Azərbaycan, Bakı, 16 oktyabr /Trend, müxbir Azad Həsənli/
Bu il Azərbaycanda yanvar-sentyabr aylarında sığorta növləri arasında ən ciddi artım kreditlərin sığortasında qeydə alınıb. Trend-in məlumatına görə, bunu Azərbaycan Sığortaçılar Assosiasiyasının (ASA) sədri Orxan Bayramov cümə axşamı mətbuat konfransında deyib.
Onun sözlərinə görə, bu növ sığorta üzrə yığımlar 3,44 dəfə artaraq 280 min manat təşkil edib: "Artımın dinamikasına görə 2-ci yeri isə həyatın ölüm halından sığorta tutub. Bu sığorta növü üzrə toplanan sığorta haqqı 3,3 dəfə artaraq 12,5 milyon manata çatıb".
ASA rəhbəri qeyd edib ki, həyatın yaşam sığortası üzrə yığımlar 55,8% artaraq 39,6 milyon manat, sağalmaz xəstəliklərdən sığorta üzrə yığımlar 2,34 dəfə artaraq 313 min manat, fərdi qəza və xəstəlik sığortası - 13,7% artaraq 8,6 milyon manat, tibbi sığorta - 6,6% artaraq 53,2 milyon manat, səyahət sığortası - 3,5% artaraq 1,6 milyon manat, istehsalatda bədbəxt hadisələrdən sığorta - 11% artaraq 24,4 milyon manat, daşınmaz əmlakın icbari sığortası - 38,5% artaraq 13,4 milyon manat, daşınmaz əmlakın istismarı ilə bağlı mülki məsuliyyətin icbari sığortası - 15,8% artaraq 310 min manat, avtonəqliyyat vasitəsi sahiblərinin mülki məsuliyyətinin icbari sığortası - 5,2% artaraq 51,3 milyon manat, sərnişinlərin icbari fərdi qəza sığortası üzrə yığımlar isə 70,7% artaraq 118,5 min manat təşkil edib.
O.Bayramov əlavə edib ki, 9 ay ərzində sığorta növləri arasında ən ciddi azalma avtonəqliyyat vasitəsi sahiblərinin mülki məsuliyyətinin könüllü sığortasında qeydə alınıb: "Bu növ sığorta üzrə yığım 56% azalaraq 725 min manata düşüb. Azalmanın dinamikasına görə 2-ci yeri yük daşıyanın mülki məsuliyyətinin sığortası tutub. Bu sığorta növü üzrə toplanan sığorta haqqı 48,8% azalaraq 3200 manat təşkil edib. Əmlakın yanğından və digər risklərdən sığortası 36,2% azalaraq 23 milyon manat, KASKO sığorta isə 34,8% azalaraq 27,7 milyon manat təşkil edib".
Sığorta ödənişlərinə gəlincə isə O.Bayramov deyib ki, ən çox artım su nəqliyyatı vasitələrinin sığortasında qeydə alınıb: "Bu növ sığorta üzrə ödənişlər 111 dəfədən çox artaraq 94 min manata çatıb. Ödənişin dinamikasına görə 2-ci yeri həyatın yaşam sığortası tutub. Bu sığorta növü üzrə ödənişlər 10,36 dəfə artaraq 20,67 milyon manat olub".
Onun sözlərinə əsasən, həyatın ölüm halından sığorta üzrə ödənişlər 4,6 dəfə artaraq 784 min manat, tibbi sığorta üzrə ödənişlər 6,5% artaraq 35,2 milyon manat, əmlakın yanğından və digər risklərdən sığortası üzrə ödənişlər 2,56 dəfə artaraq 6,1 milyon manat, KASKO (könüllü avtomobil sığortası) üzrə ödənişlər 4,2% artaraq 20,6 milyon manat, istehsalatda bədbəxt hadisələrdən sığorta üzrə ödənişlər 2,33 dəfə artaraq 2,03 milyon manat, daşınmaz əmlakın icbari sığortası üzrə ödənişlər 28,5% artaraq 1,54 milyon manat, avtonəqliyyat vasitəsi sahiblərinin mülki məsuliyyətinin icbari sığortası üzrə ödənişlər 13,2% artaraq 21 milyon manat təşkil edi".
ASA rəhbəri vurğulayıb ki, sığorta ödənişləri üzrə ən çox azalma isə işçilərin dələduzluğu sığortasında qeydə alınıb. Bu sığorta növü üzrə ödənişlər 33,8 dəfə azalıb və 65,6 min manat təşkil edib: "Azalmanın dinamikasına görə 2-ci yeri kənd təsərrüfatı bitkiləri məhsullarının sığortası tutub. Bu sığorta növü üzrə ödənişlər 17,4 dəfə azalaraq 22,7 min manata düşüb".
Fərdi qəza və xəstəlik sığortası üzrə ödənişlər 5% azalaraq 1 milyon manat, səyahət sığortası üzrə ödənişlər isə 9,2% azalaraq 196,5 min manat təşkil edib.
Hesabat dövründə Azərbaycanda 28 sığorta və 1 təkrar sığorta şirkəti fəaliyyət göstərib.