Azərbaycan, Bakı, 13 mart /Trend, müxbir E.İsmayılov/
ARDNŞ avrobondların ikinci dəfə yerləşdirilməsindən əldə olunan gəlirləri hissələrlə xaricdən alınan borcların ödənilməsinə yönəldəcək. Trend-in məlumatına görə, bu barədə çərşənbə günü jurnalistlərə ARDNŞ prezidenti Rövnəq Abdullayev bildirib.
"Avrobondların ikinci dəfə yerləşdirilməsindən əldə olunan gəlirlərin əsas hissəsi daha əvvəl cəlb olunan kreditlərin ödənilməsinə, digər hissəsi isə ARDNŞ tərəfindən müstəqil işlənən yataqlarda neft hasilatının artırılması ilə bağlı proqramların həyata keçirilməsinə yönəldiləcək", - Abdullayev deyib.
Onun sözlərinə görə, proqramın hazırlanması aprel ayının əvvəlində yekunlaşacaq və onun əsas məqsədi neft hasilatını minimum 1 milyon ton, maksimum isə 2 milyon tona çatdırmaqdır. Ötən il Dövlət Neft Şirkəti 8,3 milyon ton neft hasil edib.
"ARDNŞ-nin dəniz yataqlarında neft hasilatının artırılması yeni və müasir texnologiyaların tədbiqi hesabına planlaşdırılır", - Abdullayev bildirib.
Şirkət rəhbərinin fikrincə, ötən və builki avrobondların buraxılması ARDNŞ-nin beynəlxalq maliyyə bazarlarında olduqca yüksək mövqelərini göstərdi. Buraxılan avrobondların 41 faizi avropalı, 32 faizi britaniyalı, 25 faizi amerikalı, 2 faizi isə digər səhmdarlar tərəfindən alınıb.
"Yerli bazar üçün nəzərdə tutulan korporativ istiqrazların yerləşdirilməsi zamanı da bu yüksək mövqelər saxlanmalıdır. Müfaviq olaraq, bu layihənin reallaşdırılması prosesində şəffaflıq və bu sahədə olan beynəlxalq norma və tələblərə riayət olunmalıdır", - Abdullayev bildirib.
Onun sözlərinə görə, hazırda yerli bazar üçün nəzərdə tutulan korporativ istiqrazların buraxılması işləri davam edir və istiqraz vərəqələrinin buraxılışını təmin edəcək layihə müəyyənləşdirilir.