Azərbaycan, Bakı, 17 aprel /Trend, müxbir İ.Xəlilova/
"Ernst and Young" audit şirkətinin Azərbaycan Respublikası Dövlət Neft Fondunun (ARDNF) maliyyə fəaliyyətinə dair konsolidə edilmiş hesabatına əsasən, 2012-ci ilin yekunları üzrə ARDNF-nin aktivləri 2011-ci ilin göstəricisi ilə müqayisədə 13,4 faiz artaraq 26 890 136 min manat təşkil edib. Trend-in məlumatına görə, bu barədə çərşənbə günü ARDNF-nin saytında dərc edilən audit hesabatında deyilir.
Pul vəsaitlərində və onların ekvivalentlərində 1 182 309 min manat (53,3 faiz artım) cəmləşib, qızıl külçələrə isə 624,735 milyon manat qoyulub.
İl ərzində ARDNF-nin uzunmüddətli aktivləri 2,3 dəfə artaraq 876,628 milyon manat olub. Bu vəsaitdən 338,057 milyon manat əmlakın alınmasına investisiya edilib.
ARDNF-nin ötən ilin yekunları üzrə cari öhdəlikləri 4,757 milyon manata bərabər olub.
Fondun kapital qoyuluşlarının ümumi həcmi 26 929 986 min manat olub ki, bu da 2011-ci ilin göstəricisini 10,6 faiz üstələyir. Əmlakın təkrar qiymətləndirilməsi üzrə ehtiyatlar 1,836 milyon manat səviyyəsində dəyişməz olaraq qalıb.
ARDNF-nin əməliyyat gəlirləri ötən il 1,4 dəfə artaraq 798,236 milyon manata çatıb. Bununla yanaşı, Fondun faiz gəlirləri 13,6 faiz azalaraq 466,882 milyon manat təşkil edib. ARDNF-nin xarici valyutalarla əməliyyatlar üzrə məzənnə fərqindən xalis gəliri 2011-ci ildə 749,751 milyon manat həcmində itki olmaqla 253,387 milyon manat təşkil edib.
2012-ci ilin yekunları üzrə ARDNF-nin xalis gəliri 787,137 milyon manat olub ki, bu da 2011-ci ilin müvafiq göstəricisini 34,76 faiz üstələyir.