Bakı. Trend:
Liqa 3-də ilk dəfə bir neçə yenilik yaşanıb. Cümə günü Fransa futbolunun yeni üçüncü peşəkar divizionunun açılış turu çərçivəsində keçirilən paralel matçlar zamanı Football Video Support sistemi ilk dəfə istifadə olunub. Mübahisəli epizodlarla bağlı məşqçilərə “video çellenc” tələb etmək imkanı verən bu hakimlik sistemi ilk olaraq Aubagne və Thionville komandaları arasındakı matçda tətbiq edilib.
Thionville-in baş məşqçisi Julien François oyunun 5-ci dəqiqəsində hakimdən mümkün qırmızı vərəqə epizoduna baxmasını istəyib. Bu qərarın doğru olduğu ortaya çıxıb: sonuncu müdafiəçi mövqeyində qayda pozuntusu etdiyi müəyyənləşdirilən Aubagne futbolçusu Bilel Tafni birbaşa qırmızı vərəqə alıb.
Liqa 3-də hər məşqçinin bir matç ərzində iki “çellenc” tələb etmək hüququ var. Məşqçi tələb etdiyi epizodla bağlı qərarın onun xeyrinə dəyişdirilməsi halında “çellenc” hüququnu qoruyur. Julien Françoisın vəziyyətində də məhz belə olub.
Bir neçə dəqiqə sonra sistem Caen–Valenciennes və Bastia–Puy-en-Velay matçlarında da ofsayddan vurulan qol və ikinci sarı vərəqə ilə bağlı epizodların araşdırılması üçün tətbiq edilib.
Fransa futbolu yeni bir mərhələyə qədəm qoymağa hazırlaşır. Bu mövsümdən etibarən Liqa 3 Football Video Support (VFS) sistemini tətbiq edən ilk Fransa peşəkar çempionatı olacaq.
Klassik VAR sistemindən fərqli olaraq, bu mexanizm hakimin təşəbbüsü ilə deyil, məhz məşqçilərin tələbi ilə istifadə ediləcək. Məşqçilərə yayımdan alınan görüntülər vasitəsilə hakimin qərarına yenidən baxılmasını tələb etmək üçün “çellenc” vermək səlahiyyəti təqdim olunacaq.
Konkret olaraq, məşqçi dördüncü hakimə kartı göstərməli və eyni vaxtda barmağını havada dairəvi şəkildə fırlatmalıdır. Dördüncü hakim isə tələbi dərhal baş hakimə çatdıracaq.
Liqa bildirir ki, bu mexanizmdən yalnız “açıq-aşkar səhv və ya gözdən qaçırılmış ciddi insident” zamanı istifadə edilə bilər. Beləliklə, “çellenc” tələb edilə biləcək dörd hal var: qol qeydə alındıqda və ya ləğv edildikdə, penalti təyin edildikdə, birbaşa qırmızı vərəqə verildikdə və ya cəzalandırılan futbolçunun kimliyini səhv müəyyən etdikdə.
Hər məşqçinin bir matç ərzində iki “çellenc” hüququ olacaq. Sistemin özəlliyi ondan ibarətdir ki, tələb əsaslı hesab edilərsə, məşqçi kartı saxlayır və matçın sonrakı mərhələsində ondan yenidən istifadə edə bilər.
Əksinə, hakim ilkin qərarını təsdiqləyərsə, həmin “çellenc” hüququ birdəfəlik itirilir.
