Azərbaycan, Bakı, 29 mart /Trend, müxbir A.Axundov/
Azərbaycanın "Standard Insurance" sığorta şirkətinin aktivləri 2013-cü ilin yekunları üzrə 3,68 faiz azalaraq ilin əvvəlindəki 25,056 milyon manata nisbətdə 24,135 milyon manat təşkil edib. Trend-in məlumatına görə, bu barədə şirkətin rəsmi mətbuatda dərc olunmuş balans hesabatında deyilir.
Sığorta şirkətinin maliyyə hesabatlılığının auditini "G&A Auditor Firması" MMC aparıb.
2013-cü ilin sonunda şirkətin uzunmüddətli aktivləri 67,166 milyon manat, qısamüddətli aktivləri isə 24,135 milyon manat təşkil edib.
Ötən il pul vəsaitlərində və onların ekvivalentlərində 11,912 milyon manat yığılıb. Bu həcmdən 7,084 milyon manat valyuta hesabında, 4,422 milyon manat isə depozit hesablarında yığılıb.
2013-cü ilin yekunları üzrə şirkətin ödənilmiş nizamnamə kapitalı dəyişməyərək 11 milyon manat səviyyəsində qalıb. Ötən ilin sonunda şirkətin məcmu kapitalı 2012-cu illə müqayisədə 6,86 faiz artaraq 12,21 milyon manat təşkil edib.
Şirkətin məcmu öhdəlikləri 12,5 faiz azalaraq 11,925 milyon manat təşkil edib.
Ötən ilin yekunları üzrə şirkətin gəlirləri 21,77 milyon manat, xərcləri isə təqribən 20,725 milyon manat olub. Şirkət 2013-cü ili 1,043 milyon manatlıq mənfəətlə başa vurub.
