Azərbaycan, Bakı, 24 avqust /Trend, müxbir E.İsmayılov/
2010-cu ildə Azərbaycan Respublikası Dövlət Neft Fonduna (ARDNF) Azərbaycanın payına düşən karbohidrogenlərin satışından daxil olan vəsaitlərin ümumi həcmindən 15,6 milyard dollar (217,8 milyon barel) "Azəri-Çıraq-Günəşli" blokunun işlənməsi layihəsindən əldə olunub. Bu barədə ARDNF-nin saytında yerləşdirilən hesabatda deyilir.
ARDNF-yə ötən il karbohidrogenlərin satışından daxil olan vəsaitlərin ümumi həcmi 15,77 milyard dollara yaxın (12,66 milyon manata yaxın) təşkil edir.
Fonda daxil olan vəsaitlərin ümumi həcmindən 137 milyon dollar "Şahdəniz" qaz-kondensat yatağının işlənməsi layihəsinin payına düşür.
Yuxarıda göstərilən layihələrlə yanaşı, 2010-cu ildə karbohidrogenlərin satışından ARDNF-yə "Suraxanı" yatağından (30 milyon dollar), "Binəqədi-Qirməki-Çaxnaqlar"dan (13,1 milyon dollar), "Kürsəngi-Qarabağlı"dan (7,2 milyon dollar) vəsait daxil olub.
Ötən ilin yekunları üzrə ARDNF-nin aktikvləri 2010-cu ilin əvvəlindəki 14,9 milyarad dollara qarşı 22,8 milyon dollar təşkil edib.
Dövlət Neft Fondu 1999-cu ildə yaradılıb və həmin vaxt onun aktivləri 271 milyon dollar təşkil edib.
ARDNF-nin Nizamnaməsinə görə, fondun vəsaitləri
strateji baxımdan mühüm infrastruktur obyektlərin tikintisi və yenidən qurulmasına, eləcə də vacib ümummilli problemlərin həlli üçün istifadə oluna bilər. 2001-2009-cu illərdə əsas diqqət həm neft sektorunun, həm də ölkədəki infrastruktur sahələrin və qeyri-neft sektorunun inkişafına yönəldilib. Hazırda fondun vəsaitləri hesabına irrqasiya, nəqliyyat sahələrində bir sıra mühüm layihələr maliyyələşdirilir.
Dövlət Neft Fondunun əsas məqsədləri bunlardır: iqtisadiyyata mənfi təsirlərin minimallaşdırılması məqsədilə fondun vəsait və aktivlərini xaricdə yerləşdirməklə müəyyən dərəcədə "holland sindromu"nun qarşısını almaq, vəsaitlərin gələcək nəsillər üçün toplanmasını təmin etmək və ölkədə cari sosial-iqtisadi prosesləri dəstəkləmək.
