Azərbaycan, Bakı, 5 iyun /Trend, müxbir E.İsmayılov/
Azərbaycan Respublikası Dövlət Neft Şirkətinin (ARDNŞ) 2025-ci ilədək kompleks tədbirlər planına əsasən, Xəzərin Azərbaycan sektorundakı "Babək" perspektiv strukturunda qaz hasilatına 2019-cu ildə başlanacaq. Trend-in məlumatına görə, bunu çərşənbə günü ARDNŞ-nin iqtisadi məsələlər üzrə vitse-prezidenti Süleyman Qasımov "Xəzər Neft və Qaz - 2013" konfransında deyib.
"Babək" strukturunun ehtiyatları 400 milyard kubmetr qaz və 80 milyon ton kondensat həcmində qiymətləndirilir.
Qasımov deyib ki, plana əsasən, "Qarabağ" perspektiv strukturunda qazın hasilatına 2020-ci ildə başlamaq planlaşdırılır.
Strukturun ehtiyatları 20 milyard kubmetr qaz və 20 milyon ton kondensat həcmində qiymətləndirilir.
Bundan əlavə, "Əşrəfi" strukturunda işlərin aparılması planlaşdırılır. Burada qaz hasilatına 2023-cü ildə başlanması gözlənilir. Bu strukturun ehtiyatları 13 milyard kubmetr qaz və 17 milyon ton neft qiymətləndirilir.