Azərbaycan, Bakı, 23 aprel /Trend, müxbir E.İsmayılov/
Xəzərin Azərbaycan sektorundakı "Ümid" dəniz qaz-kondensat yatağının işlənməsi prosesi yaxın vaxtlarda hasilatın pay bölgüsü (PSA) haqqında müqavilə çərçivəsinə salına bilər. Trend-in məlumatına görə, bunu jurnalistlərə Azərbaycan Respublikası Dövlət Neft Şirkətinin (ARDNŞ) iqtisadi məsələlər üzrə vitse-prezidenti Süleyman Qasımov deyib.
Onun sözlərinə görə, hazırda yatağın işlənməsi "SOCAR Ümid" müştərək müəssisəsi (MM) tərəfindən həyata keçirilir. MM "Ümid" yatağının işlənməsi məqsədi ilə yaradılmış şirkətdir. ARDNŞ-nin MM-də iştirak payı 80 faiz, "Nobel Oil" şirkətinin isə 20 faizdir.
S.Qasımov qeyd edib ki, yatağın servis müqaviləsi çərçivəsində işlənməsi imkanı da nəzərdən keçirilib.
"Nobel Oil"ın layihədəki iştirakına gəlincə, o bildirib ki, yeni yatağın işlənməsi çərçivəsində risklərin bölüşdürülməsi zərurətdən irəli gəlir.
Qeyd edək ki, ARDNŞ 2010-cu ildə "Ümid" yatağının açıldığını bəyan edib. ARDNŞ mütəxəssislərinin hesablamalarına və ilk kəşfiyyat quyusunun qazılmasının nəticələrinə əsasən, yatağın 200 milyard kubmetrdən çox qaz və 40 milyon ton kondensat ehtiyatı var.