Azərbaycan, Bakı, 3 sentyabr /Trend, müxbir Emil İsmayılov/
2014-cü ilin I yarısında ABŞ Azərbaycandan 84 min barel neft məhsulu idxal edib. 2013-cü ilin analoji dövründə bu göstərici 58 min barel təşkil edib. Bu barədə Trend çərşənbə günü ABŞ-ın Dövlət Enerji İnformasiya İdarəsinin (EIA) yaydığı məlumata istinadən xəbər verir.
Məlumata görə, idxal edilmiş məhsulların ümumi həcmi naftanın payına düşür. Nafta neft-kimya sənayesində xammal qismində istifadə olunur.
ABŞ 2013-cü ildə Azərbaycandan 366 min barel neft məhsulu idxal edib. 2012-ci ildə bu rəqəm 46 min barelə bərabər olub.
2009-cu ildən davam edən uzunmüddətli aralıqdan sonra ABŞ inişil Azərbaycandan neft məhsullarının tədarükün bərpa edib. 2008-ci ildə ABŞ-a 308 min barel Azərbaycan istehsallı neft məhsulu tədarük olunub.
Qeyd edək ki, Azərbaycanda neft məhsulları iki neft emalı zavodunda (NEZ) istehsal olunur. Həmin zavodların ümumi gücü ildə 16 milyon ton təşkil edir. Hər iki NEZ ARDNŞ-nin tərkibindədir.
