Bakı. Trend:
Anglo Asian Mining plc şirkəti Azərbaycanda mis istehsalını əhəmiyyətli dərəcədə artıracaq. Trend xəbər verir ki, bu barədə şirkətin baş icraçı direktoru Rza Vəziri bildirib.
"2025-ci il üçün istehsal proqnozumuzu təqdim etməkdən məmnunluq duyuram: 28 000 - 33 000 unsiya qızıl və 6 500 - 6 800 ton mis. Mis şirkətin ümumi istehsal portfelində getdikcə daha mühüm yer tutur. 2025-ci ildə istehsalımız 2024-cü illə müqayisədə əhəmiyyətli dərəcədə artacaq. Qeyd edim ki, 2024-cü ildə istehsal fəaliyyətimiz qismən dayandırıldığı üçün nəticələrimizə təsir etmişdi", – deyə o vurğulayıb.
2024-cü ildə şirkət 15 073 unsiya qızıl və 377 ton mis hasil edib.
Bildirilir ki, 2025-ci il Anglo Asian üçün dönüş nöqtəsi olacaq, çünki şirkət yeni Gilar mədəninin açılması ilə mis istehsalını artırmağa başlayacaq. Gözlənilir ki, 2025-ci ildə mis hasilatı rekord səviyyəyə çatacaq.
Yeni yeraltı Gilar mədənində hasilata 2025-ci ilin birinci rübündə start veriləcək. İl ərzində 1,8% mis və ton başına 1,47 qram qızıl ehtiva edən təxminən 400 000 ton filiz hasil olunması planlaşdırılır.
"2025-ci il şirkət üçün əlamətdar olacaq, çünki biz istehsal portfelimizdə misin payını artırmağa başlayırıq və növbəti illərdə daha iri miqyaslı "Qaradağ" və "Xarxar" mis yataqlarının istismara verilməsinə hazırlıq görürük", – deyə Vəziri qeyd edib.
Qeyd edək ki, Anglo Asian Mining plc Azərbaycanda yüksək keyfiyyətli hasilat və kəşfiyyat aktivlərinə malik olan qızıl, mis və gümüş istehsalçısıdır. Şirkət 2024-cü ildə 16 760 unsiya qızılı qızıl ekvivalentində (GEO) istehsal edib. 2024-cü ildə istehsal ekoloji səbəblərdən qismən dayandırılmışdı, lakin ilin sonuna qədər tam bərpa olunub.