Azərbaycan, Bakı, 18 dekabr /Trend, müxbir T.Hacıyev/
Azərbaycanda keçirilən seçkilər konkret məsələ kimi Avropa Şurasının Parlament Assambleyasının qış sessiyasının gündəliyində olmayacaq. Bu barədə şənbə günü Trend-ə Azərbaycanın AŞPA-dakı nümayəndə heyətinin sədri, Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib.
"Yanvar sessiyası ayın 24-dən 30-dək davam edəcək. Biz artıq sessiyaya hazırlıq prosesinə başlamışıq. Bütün məsələlər bizi maraqlandırır. Konkret məsələ kimi deyil, ümumi seçkilər kontekstində Azərbaycanda keçirilmiş seçkilər də gündəmdə olacaq", - Seyidov əlavə edib.
Azərbaycanda noyabrın 7-də parlament seçkiləri keçirilib.
Səsvermədə seçicilərin 50,14 faizi (2480205 seçici) iştirak edib. Seçkilərdə 690 namizəd deputat mandatı almaq uğrunda mübarizə aparıb.
Azərbaycanda parlament seçkiləri majoritar sistem üzrə 125 seçki dairəsində aparılır. Bundan əvvəlki seçkilər 2005-ci ilin noyabr ayında keçirilib.
Seyidovun sözlərinə görə, qış sessiyasında müxtəlif ölkələrin dövlət başçıları da iştirak edəcək.
"Sessiyada Türkiyənin Prezidenti və xarici işlər naziri də iştirak edəcək. İnsan haqları ilə bağlı məsələlər müzakirə olunacaq. Ona görə də biz hər bir məsələdə maraqlıyıq və aktiv iştirak etmək niyyətindəyik", - o deyib.
Seyidov bu sessiyanın Azərbaycan üçün xüsusi əhəmiyyətə malik olduğunu da vurğulayıb. "Azərbaycanın Avropa Şurasına üzv olmasının 10 illiyi qeyd olunacaq. Bununla bağlı tədbirlər planlaşdırmışıq və bu tədbirləri həyata keçirəcəyik", - o qeyd edib.
Azərbaycan nümayəndə heyətinin rəhbəri onu da bildirib ki, Qarabağ məsələsi daim AŞ PA-nın gündəmində saxlanılır.
"Hər gün, hər bir iclasda Qarabağ məsələsini qaldırırıq. Orada problem öz həllini tapana qədər biz bu məsələni daim Avropa Şurasının gündəliyində saxlayacağıq", - Seyidov bildirib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
