Azərbaycan, Bakı, 11 mart /Trend, müxbir Ü.İsmayılova/
Yanvarda Azərbaycanda 7174 daşınmaz əmlak obyekti qeydiyyatdan keçib. Bu, 2010-cu ilin yanvarındakından 6,1 faiz azdır. Bu barədə Əmlak Məsələləri Dövlət Komitəsinin cümə günü yayılan məlumatında deyilir.
Yanvarda 2196 obyekt (ötən ilin yanvarındakından 16,5 faiz az) ilkin, 4978 obyekt (0,6 faiz azalma) təkrar qeydiyyatdan keçib.
Hesabat müddətində 1119 min ipoteka müqaviləsi (16,4 faiz az) dövlət qeydiyyatına alınıb.
2830 mənzil (özəlləşdirmə), 1383 fərdi ev və bağ, 2572 torpaq sahəsi, 182 yaşayış olmayan bina, 113 yaşayış olmayan ərazi, 40 mülkiyyət kompleksi kimi müəssisə və 8 çoxmərtəbəli yaşayış binası qeydiyyatdan keçib.
Qeydiyyata alınan 2748 obyekt və ya 38,3 faiz paytaxtın payına düşüb. Ən az say Daşınmaz Əmlakın Dövlət Reyestri Xidmətinin Şamaxı ərazi idarəsinin payına düşüb.
Daşınmaz əmlak obyektlərinin qeydiyyatı üzrə əməliyyatların çox hissəsi Abşeron rayonu (586 əməliyyat), Sumqayıt şəhəri (490 əməliyyat), Gəncə şəhəri (417 əməliyyat) və Lənkəran şəhərinin (564 əməliyyat) payına düşüb.
Dövlət komitəsindən bildiriblər ki, cari il fevralın 1-nə olan məlumata görə, ölkədə 821 mənzil özəlləşdirilib. Bu, ötən ilin analoji dövr göstəricisindən 14,1 faiz çoxdur. Dövlət müstəqilliyi bərpa edildikdən sonra ölkədə 435 714 mənzil özəlləşdirilib.
2006-cı ildə ölkədə 492 320 daşınmaz əmlak obyekti özəlləşdirilib. Bunun 80 352-si 2006-cı ildə, 115 616-sı 2007-ci ildə, 121 097-si 2008-ci ildə, 89 054-ü 2009-cu ildə, 94 680-si isə 2010-cu ildə özəlləşdirilib.
