Azərbaycan, Bakı, 08 aprel / Trend /
2009-cu ilin yanvar-mart aylarında layihə iştirakçıları tərəfindən Bakı-Tbilisi-Ceyhan (BTC) boru kəməri ilə 8,2 mln. ton neft nəql olunub. Bu göstərici ötən ilin analoji dövründə 8,7 mln. tona bərabər olub. Bu barədə SOCAR-ın (Azərbaycan Respublikası Dövlət Neft Şirkəti) məlumatında bildirilir.
Cari ilin mart ayında boru kəməri ilə 2008-ci ilin mart ayının 2,9 mln. ton neftinə nisbətdə 3,1 mln. ton neft ixrac olunub. Ümumilikdə nəqlə başlandığı vaxtdan bu günədək təqribən 78,6 mln. ton neft nəql olunub.
Cari ilin birinci rübü ərzində Türkiyənin Ceyhan limanından 8,4 mln. ton, ötən ilin birinci rübündə isə 8,9 mln. ton neft tədarük olunub.
BTC ilə "Azəri-Çıraq-Günəşli" yataqları blokundan hasil edilən yüngül neft və "Şahdəniz" yatağından hasil edilən kondensat nəql olunur. Boru kəmərinin layihə üzrə maksimal nəql gücü bir mln. barel neft təşkil edir.
Boru kəmərinin maksimal layihə nəql gücü bir mln.bareldir, lakin bu yaxınlarda BTC-nin nəql gücünün sutkada 1,2 mln.barelədək artırılması üzrə işlər başa çatdırılıb.
Bu boru kəməri ilə neft Azərbaycan, Gürcüstan və Türkiyə ərazisindən keçməklə sonuncunun Aralıq dənizindəki Ceyhan limanına tədarük olunur.
BTC neft kəmərinin ümumi uzunluğu 1768 km-dır. Boru kəmərinin 443 km-i Azərbaycan, 249 km-i Gürcüstana, 1076 km-i isə Türkiyə ərazisindən keçir.
Neft kəmərinin operatoru BP şirkətidir. "BTC Co"nun səhmdarları: BP (30,1 faiz); "AzBTC" (25 faiz); "Chevron" (8,9 faiz); "StatoilHydro" (8,71 faiz); "TRAO" (6,53 faiz); "Eni" (5 faiz); "Total" (5 faiz); "Itochu" (3,40 faiz); "Inpex" (2,5 faiz); "ConocoPhillips" (2,50 faiz) və "Hess" (2,36 faiz).