2006-cı ilin yanvar-sentyabr aylarında Azərbaycanın "Azəri-Çiraq-Günəşli" dəniz yataqlarının işlənilməsi layihəsi üzrə 2006-cı il üçün nəzərdə tutulmuş 2,552 mlrd. dollarlıq əsaslı xərclərin 1,849 mlrd. dollarını xərclənib. Bakı-Tbilisi-Ceyhan neft kəməri layihəsi çərçivəsində 2006-cı ilin yanvar-sentyabr aylarında 2006-cı il üçün nəzərdə tutulmuş 932 mln. dolların 834 mln. dolları xərclənib. Trend in xəbər verdiyi kimi, bu barədə bu gün mətbuat konfransında "BP Azerbaijan" şirkətinin prezidenti Devid Vudvord açıqlama verib.
Onun sözlərinə görə, "Şahdəniz" layihəsi üzrə yanvar-sentyabr aylarında 2006-cı il üçün nəzərdə tutulmuş 865 mln. dolların 683 mln. dolları xərclənib. Beləliklə, 2006-cı ilin yanvar-sentyabr aylarında hər üç layihə üzrə əsaslı xərclər 3,366 mlrd. dollar təşkil edib.
2006-cı ilin yanvar-sentyabr ayları ərzində Azərbaycan Beynəlxalq Əməliyyat Şirkəti tərəfindən "Azəri-Çiraq-Günəşli" yataqlarından sutkada orta hesabla 448 min barrel "Azeri Light" markalı neft (üçüncü kvartalda orta hesabla 523 min barrel) hasil olunub.
D. Vudvordun sözlərinə görə, 2006-cı il üçün yataqda orta sutkalıq neft hasilatı 458 min barrel səviyyəsində nəzərdə tutulub. 141 min barrel "Çiraq", 226 min barrel "Mərkəzi Azəri", 81 min barrel "Qərbi Azəri" və 10 min barrel "Şərqi Azəri" yatağının payına düşür.
