Azərbaycan, Bakı, 9 sentyabr /Trend, müxbir H.Vəliyev/
AzDATACOM internet infrastrukturunun bütün ölkə ərazisini əhatə etmə işləri oktyabr ayına kimi tamamlanacaq. Bu barədə Trend-ə cümə günü Azərbaycan Rabitə və İnformasiya Texnologiyaları Nazirliyi Məlumat Hesablama Mərkəzinin direktor müavini Sahib Nəcəfov bildirib.
Nəcəfovun sözlərinə görə, bu gün Şəki-Zaqatala zonasında zəruri telekomunikasiya cihazlarının quraşdırılması işləri aparılır.
"Hazırda AzDATACOM şəbəkəsi Qax, Zaqatala, Balakən, Oğuz və Yardımlı, eləcə də işğal olunmuş ərazilər istisna olmaqla, bütün respublika ərazisini əhatə edir. İşğal olunmuş ərazilər istisna olmaqla, adıçəkilən bütün rayonlar oktyabr ayınadək əhatə olunacaq", - Nəcəfov deyib.
Bu işlər "Milli elektron idarəçilik şəbəkəsi təşəbbüsü" layihəsi çərçivəsində həyata keçirilir.
Şəbəkə optik-lif xətlər əsasında hazırlanıb. Bu, həm təşkilatların zona şöbələri, həm də VPN texnologiyası ilə idarələrarası məlumat ötürmədə yüksək sürət və keyfiyyəti təmin edir.
Şəbəkənin ötürmə qabiliyyəti 10 Gbit/s-dir ki, bu da məsafədən təhsil, elektron ticarət və biznesin məsafədən idarəsi, habelə VoIP, IP-TV və s. kimi qeyri-ənənəvi rabitə xidmətlərini təşkil etməyə imkan verir.