Azərbaycan, Bakı, 24 aprel / Trend , müxbir K.Ramazanova/ Azərbaycanda İcra Hakimiyyəti qurumları tərəfindən qanunun icra olunması və seçki administrasiyası və məhkəmələr sahəsində də irəliləyiş əldə olunmalıdır. Bu barədə Trend a elektron poçt vasitəsilə ATƏT-in Demokratik Təsisatlar və İnsan Hüquqları Bürosunun (DTİHB) direktoru səfir Kristian Strohal məlumat verib.
"Demokratik seçkilər keçirilməsi üçün təkcə hüquqi islahatlar keçirmək kifayət deyil. Əminəm ki, iradə olduğu halda hakimiyyət demokratik seçkilər keçirə bilər" - Strohal yazır.
2008-ci ildə Azərbaycanda keçiriləcək prezident seçkiləri ərəfəsində Seçki Məcəlləsinin (SM) təkmilləşdirilməsi ilə bağlı müzakirələr aparılır. SM üzərində işlərin payızda tamamlanması planlaşdırılır, lakin proses seçki komissiyası tərkibinin formalaşdırılması üzrə müxalifət partiyalarının mövqeləri səbəbindən uzadılıb.
Üç müxalifət partiyalarını birləşdirən "Azadlıq" bloku iyun ayında Venesiya Komissiyasına düzəlişlər paketi və Azərbaycan Seçki Məcəlləsinə əlavələr barədə təkliflər göndərib. Orada seçki komissiyasının yeni tərkibinin paritet əsaslarla formalaşdırılması məsələləri öz əksini tapıb.
Onun sözlərinə görə, təklif olunan dəyişikliklərin layihəsində bir sıra öz həllini tapmamış və ya öz həllini tam olaraq tapmamış məsələlər qalmaqdadır. Buraya seçki komissiyalarının tərkibi, şikayət və müraciətlərin baxılması prosesi, namizədliklə əlaqədar müddəalar və nəticələrin elan olunması daxildir.
"İctimai etimadı yaratmaq məqsədi ilə yaxşı olardı ki, seçki komissiyalarının sədrləri müxtəlif partiyaları təmsil etsinlər və hər hansı bir partiya üstünlük (çoxluq) təşkil etməsin" - deyə Srohal bildirib.
Seçki komissiyalarının tərkibi əhəmiyyət təşkil edən məqamlardan yalnız biridir. Seçki komissiyalarının tam funksional olması və onların qərəzsiz və qanuna müvafiq şəkildə fəaliyyət göstərməsi də əhəmiyyət kəsb edən məsələlərdəndir.
ATƏT ofisinin direktoru qeyd edib ki, parlament bütün siyasi partiyaların və vətəndaş cəmiyyəti nümayəndələrinin fikirlərini, eləcə də Venesiya Komissiyasının və ATƏT/DTİHB-nun tövsiyələrini diqqətə almalıdır.
"Bu dəyişikliklərin qəbulu və prezident seçkilərinə qədər tətbiq edilməsi üçün olduqca az vaxt qalmasına baxmayaraq, bunu həyata keçirmək mümkündür" - ATƏT nümayəndəsi vurğulayıb.
Strohal KİV azadlığı ilə bağlı məsələlərə də toxunaraq qeyd edib ki, sərbəst KİV-lər seçkilərin demokratik prinsiplər əsasında keçirilməsi üçün olduqca böyük əhəmiyyət kəsb edir: "Bu kifayət qədər narahatlıq yaratmağa davam edən bir sahədir".
Müəlliflə əlaqə saxlamaq üçün elektron ünvan: trend