Azərbaycan, Bakı, 10 dekabr /Trend, müxbir K.Zərbalıyeva/
Azərbaycanda məhkəmə qərarlarının icra olunmaması ilə bağlı problemlər var. Bunu Trend-ə Azərbaycan dövlətinin İnsan Hüquqları üzrə Avropa Məhkəməsindəki səlahiyyətli nümayəndəsi Çingiz Əsgərov deyib.
"Məhkəmə qərarlarının icra olunmaması ilə bağlı problem var və bu qərarlar əsasən məcburi köçkünlər tərəfindən vətəndaşların mənzillərinin zəbt olunması ilə bağlıdır. Artıq bu problem həllini tapır. Məcburi köçkünlər üçün yeni evlər tikilir və onlar yeni mənzillərə köçürülürlər", - Əsgərov deyib.
Avropa İnsan Hüquqları Konvensiyasının 60 illiyinə həsr olunmuş "Avropa İnsan Hüquqları Konvensiyasının implementasiyasında səmərəli mexanizmlər və vasitələr" mövzusunda keçirilən beynəlxalq konfransdakı Avropa Şurasının İnsan hüquqları və hüquqi məsələlər üzrə Baş direktoratının bölmə rəhbəri Markus Yaeger çıxışında Azərbaycanda insan hüquqlarının təmin olunması sahəsində müəyyən problemlər olduğunu deyib.
Onun sözlərinə görə, Avropa Məhkəməsi düşünür ki, Azərbaycanda media və jurnalistlərin azadlığı məsələsində pozitiv dəyişikliklərə ehtiyac var.
"Azərbaycana qarşı qəbul edilən qərarların təhlili göstərir ki, məhkəmə qərarlarının icra olunmaması, yaşamaq hüququ və işgəncələrə məruz qalmamaq hüququnun pozulması, birləşmək azadlığı ilə bağlı problemlər var. Azərbaycana qarşı qəbul edilən 40 qərarın heç biri tam icra olunmayıb", - Yaeger əlavə edib.
Yaegerin fikirlərinə münasibət bildirən Əsgərovun sözlərinə görə, Azərbaycana qarşı qəbul edilən qərarların əksəriyyəti 2002-2003-cü illərə təsadüf edir.
"QHT-lərin qeydiyyatı ilə bağlı Azərbaycanda problem yoxdur. Avropa Şurasının Nazirlər Komitəsinə məlumat verilib ki, bu sahədə yeni qanun qəbul olunub, qeydiyyat proseduru sadələşdirilib", - səlahiyyətli nümayəndə deyib.
İşgəncələrə məruz qalmaqla bağlı məsələyə gəlincə, Əsgərov bildirib ki, bununla bağlı Avropa Şurasına bütün üzv dövlətlərə qarşı qərarlar var.
"İşgəncələrə məruz qalmamaq hüququnun pozuntusu ilə bağlı Azərbaycandan olan işlər əsasən prosesual baxımdan pozuntuların aşkar edilməsi ilə əlaqədardır. Yəni qəbul edilən qərarlar işgəncə faktları ilə bağlı şikayətlərə qanunla müəyyən edilmiş vaxtda və qaydada baxılmaması ilə bağlıdır", - Əsgərov deyib.
O, qeyd edib ki, bu məsələ ilə bağlı aidiyyatı qurumların əməkdaşları ilə treninqlər keçirilir, hakimlərə müəyyən tövsiyyələr verilir.
Səlahiyyətli nümayəndə qeyd edib ki, indiyədək Azərbaycana qarşı qəbul edilən qərarların hamısı icra olunub, şikayətçilərə təzminat ödənilib.
"Bir neçə iş üzrə qərarların fiziki cəhətdən icrası mümkün deyil və onun həlli yollarını axtarırırq. Bu işlərdən biri Nail Hümbətovun Azərbaycana qarşı işidir", - Əsgərov vurğulayıb.
