...

Bakı Ali Neft Məktəbi ilə "Microsoft Azərbaycan" şirkəti arasında Anlaşma Memorandumu imzalanıb (FOTO)

Cəmiyyət Materials 18 İyun 2013 15:19 (UTC +04:00)
İyunun 18-də Bakı Ali Neft Məktəbində (BANM) ali məktəbin rektoru Elmar Qasımov və “Microsoft Azərbaycan” şirkətinin baş direktoru Rüfət Hacıəlibəyov arasında birgə əməkdaşlığın qurulması və inkişaf etdirilməsi məqsədilə Anlaşma Memorandumu imzalanıb.
Bakı Ali Neft Məktəbi ilə "Microsoft Azərbaycan" şirkəti arasında Anlaşma Memorandumu imzalanıb (FOTO)

Azərbaycan, Bakı, 18 iyun /Trend/

İyunun 18-də Bakı Ali Neft Məktəbində (BANM) ali məktəbin rektoru Elmar Qasımov və "Microsoft Azərbaycan" şirkətinin baş direktoru Rüfət Hacıəlibəyov arasında birgə əməkdaşlığın qurulması və inkişaf etdirilməsi məqsədilə Anlaşma Memorandumu imzalanıb.

Ali məktəbdən Trend-ə verilən məlumata görə, Anlaşma Memorandumunda BANM-də "Microsoft İT Akademiyası"nın yaradılmasına yardım, tələbə və müəllimlər arasında "Microsoft Dreamspark" proqramının faydaları barədə məlumatların yayılmasına dəstək, tələbə və müəllimlərin "Microsoft Office 365" proqramından istifadəsinin əlaqələndirilməsi və idarə edilməsinə yardım, eləcə də tələbə və müəllimlər arasında lisenziyalaşdırılmış proqramlardan istifadənin təşviqinə şərait yaradılması nəzərdə tutulub.

Tədbirdə çıxış edən Bakı Ali Neft Məktəbinin rektoru E.Qasımov qeyd edib ki, müasir dünyanı informasiya texnologiyalarsız təsəvvür etmək mümkün deyil. Bu sahənin inkişafı nəticəsində bu gün dünya bütün sahələrdə sürətlə inkişaf etməkdədir.

Azərbaycanda da bu sahənin inkişafına böyük önəm verildiyini bildirən rektor vurğulayıb ki, ölkə başçısı cənab İlham Əliyevin sərəncamı ilə bu il ölkəmizdə "İnformasiya-kommunikasiya texnologiyaları" ili elan olunub. O, qeyd edib ki, ölkəmiz üçün tarixi hadisəyə çevrilmiş Azərbaycanın ilk "Azerspace/Africasat-1" peyki 2013-cü il fevralın 7-də orbitə buraxılıb. Bununla yanaşı, E.Qasımov Azərbaycan Respublikası Prezidentinin İnformasiya Texnologiyaları İnstitutunun yaradılması haqqında sərəncam imzaladığını bildirib.

Tədbirdə çıxış edən "Microsoft Azərbaycan" şirkətinin baş direktoru Rüfət Hacıəlibəyov bildirib ki, müasir dünyada informasiya texnologiyalarının tətbiqi, tədrisdə istifadəsi və tələbələrin onlayn əməkdaşlıq mühitinin inkişaf etdirilməsi labüddür.

Tədbir çərçivəsində tərəflər Bakı Ali Neft Məktəbinin təhsil kurikulumunda informasiya-kommunikasiya texnologiyalarının inteqrasiyası istiqamətində bacarıqların inkişaf etdirilməsi sahəsində gələcək fəaliyyətləri haqqında danışıblar.

Məqalədə:
Xəbər lenti

Xəbər lenti