Azərbaycan, Bakı, 1 avqust /Trend, müxbir Emil İsmayılov/
ABŞ-ın Rusiyanın bəzi şirkət və banklarına, o cümlədən Azərbaycan Respublikası Dövlət Neft Fondunun (ARDNF) səhmdarı olduğu "Bank VTB"-yə qarşı elan etdiyi sanksiyalar uzunmüddətli perspektivdə Fondun gözlənilən gəlirlərinə əhəmiyyətli dərəcədə təsir etməyəcək. Bunu Trend-ə ARDNF-dən deyiblər.
Fonddan bildiriblər ki, "Bank VTB"-nin səhmləri ARDNF-nin investisiya siyasətinə əsasən həyata keçirilib: "Məqsəd ARDNF-nin uzunmüddətli gəlirliliyini artırmaq və investisiya portfelinin daha dərin şaxələndirilməsi olub".
ARDNF-dən deyiblər: "Biz "Bank VTB"-nin davamlılığını və kredit qabiliyyətini nəzərə alaraq hesab edirik ki, Rusiyanın bir sıra şirkət və banklarına, o cümlədən "Bank VTB"-yə qarşı elan edilmiş sanksiyalar və bunlarla bağlı məhdudiyyətlər səhmdarlar, əmanətçilər və kreditorlar qarşısında öhdəliklərə mənfi təsir etməyəcək".
Fonddan hesab edirlər ki, mövcud sanksiyalar qısamüddətli dəyişikliklərə gətirib çıxara bilər: "ARDNF-nin investisiya strategiyası uzunmüddətli olduğuna görə bütün bunlar Fondun gəlirlərinə əhəmiyyətli dərəcədə təsir etməyəcək".
