Azərbaycan, Bakı, 10 noyabr/ Trend Cap , müxbir A.Bədəlova/ "Nabukko" boru kəmərinin çəkilməsi layihəsi Avropanın qaz bazarında rəqabəti təmin edəcək və enerji tədarüklərinin təhlükəsizliyini artıracaq, - Aİ-nin energetika məsələləri üzrə komissarı Andris Piyebalqs hesab edir.
""Nabukko" layihəsi bazarda daha çox rəqabət, enerji tədarüklərinin daha artıq təhlükəsizliyi və nəhayət daha böyük həcmdə qaz deməkdir", - Piyebalqsın rəsmi saytda yerləşdirilmiş çıxışında bildirilib.
Komissarın sözlərinə görə, Avropada qaz istehsalı azalır və beləliklə, Köhnə Dünyanın idxaldan asılılığı artır. "Bu gün Avropa qazın böyük hissəsini 30 il ərzində tədarükçü qismində etibarlılığını sübut etmiş 3 ölkədən idxal edir: Rusiya, Norveç və Əlcəzair", - Piyebalqs bildirib.
"Bundan əlavə, Aİ-nin daxili qaz bazarı real olur və avropalı istehlakçılar üçün rəqabət və azad seçimin təmin edilməsi məqsədilə bizə olduqca çox mənbə lazımdır", - o vurğulayıb.
Komissarın sözlərinə görə, qaza artan tələbat mövcud infrastrukturun üzərinə böyük yük qoyacaq. "Böhranlı hallarda zəruri tədarüklərin təmini üçün bizə alternativ mənbələr lazımdır", - Piyebalqs bildirib.
Onun sözlərinə görə, "Nabukko" layihəsi Avropanın ənənəvi tədarükçülərinin əleyhinə yönəlməyib.
"Avropa komissiyası "Şimal axını" boru kəmərini fəal surətdə dəstəkləməkdə davam edir və "Cənub axını" ilə rəqabət aparmır. O, Ukraynanın tranzit boru kəməri sisteminin müasirləşdirilməsini, Əlcəzairdən Qalsi və Medqasdan iki yeni boru kəmərinin inkişafını fəal surətdə dəstəkləyir", - Piyebalqs bildirib.
"Komissiya digər ənənəvi tədarükçülərlə əməkdaşlığın genişləndirilməsinə paralel olaraq diversifikasiya siyasəti aparır", - Piyebalqs əlavə edib.
Dəyəri $12,4 mlrd. olan "Nabukko" qaz kəməri ilə 2013-cü ildən Azərbaycan və Mərkəzi Asiyadan Avropa İttifaqı ölkələrinə qaz ixrac etmək üçün nəzərdə tutulur. Qaz kəmərinin çəkilməsi 2010-cu ilə təyin edilib. Boru kəmərinin maksimal ötürmə gücü ildə 31 mlrd. kubmetr olacaq. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər biri bərabər paya - 16,67 faiz paya malikdir.
"Şimal axını" - Baltik dənizinin dibi ilə Rusiya və Almaniya arasında qaz kəməridir. Qaz kəmərinin gücü ildə 55 mlrd. kubmetr qaz təşkil etməlidir. Qaz kəmərinin dəniz hissəsinin operatoru - Nord Stream AG. - Nord Stream AG-nin səhmdarları aşağıdakılardır: Qazprom - 51 faiz, Wintershall - 20 faiz, E.ON Ruhrgas - 20 faiz, Gasunie - 9 faiz.
"Cənub axını" Qara dənizin dibi ilə Novorossiyskdən Bolqarıstanın Varna limanınadək çəkiləcək Rusiya-İtaliya qaz kəməri layihəsidir. Bundan sonra onun iki qolu Balkan yarımadası vasitəsilə İtaliya və Avstriyaya gedəcək. Planlara əsasən, layihə 2013-cü ildə başa çatdırılmalıdır. Qaz kəmərinin sualtı hissəsinin uzunluğu 900 km olacaq və 50 faizin 50 faizə prinsipi üzrə "Qazrpom" və ENİ-yə məxsus olacaq. Kəmərin çəkiləcəyi maksimal dərinlik - 2000 m.dir. Qaz kəməri layihəsinə ümumi sərmayələr 10 mlrd. dollardan çox qiymətləndirilir.
Müəlliflə əlaqə saxlamaq üçün elektron ünvan: sap