Bakı. Trend:
Türkiyənin Təbii Fəlakət və Fövqəladə Halların İdarə Edilməsi İdarəsi (AFAD) Mərmərə dənizində baş verən zəlzələdən sonra bölgədə 291 afterşok qeydə alındığını açıqlayıb.
Trend-in məlumatına görə, aprelin 23-də episentri Silivri sahillərindən təxminən 24 kilometr uzaqlıqda yerləşən və 6,2 maqnitudasında qeydə alınan yeraltı təkan İstanbulun cənub sahillərindəki yaşayış məntəqələrində 5 bal gücündə hiss olunub. Hazırda bölgədə afterşokların sayı azalmaqda davam edir.
AFAD-ın açıqlamasına əsasən, baş verən afterşokların 283-ü 3,9 və daha aşağı maqnitudada olub, onların əksəriyyəti isə 3 baldan zəif təkanlardır. Yalnız 8 afterşok 4 maqnitudanı keçib.
“Son 28 saat ərzində 4 saatlıq intervallarda aparılan müşahidələr göstərir ki, postseysmik aktivlik azalma tendensiyası göstərir və yeraltı təkanların qarşıdakı həftələrdə sönəcəyi proqnozlaşdırılır,” – deyə bəyanatda qeyd olunub.
AFAD əlavə edib ki, zəlzələ nəticəsində sərbəst buraxılan enerji trotil ekvivalentində 30 kilotondan çox olub ki, bu da 2019-cu il sentyabrın 26-da eyni bölgədə baş vermiş 5,8 maqnitudalı zəlzələdən təxminən dörd dəfə artıqdır.
Uzun müddətdir həyata keçirilən risklərin azaldılması tədbirləri nəticəsində zəlzələ heç bir struktur zərərə və insan tələfatına səbəb olmayıb.